Region Karlsruhe

Zur Erklärung vorneweg: Einige Kritiker hier bei Gastroguide haben sich eine Bewertung auf pfälzisch gewünscht. Dazu passt der Besuch vom 29. Dezember ganz gut, weil ich da mit einem echten Pfälzer zu Gast war. 


"Kannsch Du Dich nimmi erinnre ?? Denk mol scharf noch. Mär sinn doch immer  mid de Rädder vun de Horschdbrigg nunner gfahre, hänn gwarte bis griieeh wird und sinn dann gerollt bis zum Gedränkemaagt, dann noch mohl ahschdännich neigedrohde und dann sinn mer in de Hindeburchschdross links den Wäch nunner am Fort entlang, wo der große Bäbbel immer war. Do sinn jetzt die Tiecher im Landaacher Zoo."  -- Än Kollech von mir im "O Ton". De Landaahcher Zoo weitet sich in de lädschde Johr pöh a pöh immer mehr aus. An dene Schdelle wo mär uns vor dreisich Johr klänne Sprungschanze fer unser BMX Rädder gebaut hän, lahfen jetzt echte Tiecher rum. 

Des Pytel`s isch äh Zoo-Gaschdschdubb, in denne Monate, wohs arrich kald isch kann ma awwer ab viere Nachmittags ohne Zooeintritt nei. Mein Kollech hatt mich an dem Dach eihgelade, unseren Wache hämm mer in de Seideschdroß abgstellt und sinn äh paar Meter geloffe.

Im Summer kann mer awwer ach schäähh drausse sitze im Lotsch Stil, schäähh gemietlich uff Korbstihl. Drinne ischs defiernoch  äh bissel mehr afrikanischer. Bodde aus Schdää, die Wänd sinn hell, an de Deck isch ach nochmohl helles Holz und die Tische sinn dunkel. Des passt, nadierlich werd viel Weih ahhgebote. In de Speisekadd schdeht drin, dass die Macher viel Zeit verträhdelt hän um die beschde Weihgüter auszusuche. Die hädden des nadierlich leichter hawwe kenne. Do hätten se ähfach de Marc074 odder mich ahrufe misse und mer häddens dähne dann gsacht. De Schdänze Maikus aus Godramschdää, odder de Heupel Mardihn aus Nussdorf, wer kennt sie ned, schdehen in de Kart. Leider wärn die Weih in viel zu klähne nullzwäfünf Schnappsgläser ausgeschenggt, fer uns kummd des nidd in Frohch.Puschdekuche noch ä mol. Mär hänn Hunger und guggen in die Speisekadd. Oh jesses, Schnekke vum Weinberch im Pännel, mein Kollech und ich ziehen do annre Schnekke vor an dem Owend. Heid sollen es die mit de Pariser Schiggelscher ah sei. 

Was gibts schunschd noch ?? Afrikanische Supp mit Mango unn Kürbis. Ob des Zeich wirklich aus Afrika kummd ?? Bis des in Landaach ahkumme isch, werds wohl verfault sei. Ich seh schun, des werd nix heid owend. "Gugg mol, do uff de Tafl" - mein Kollehch had äh Ahgebot entdeckt. Afrikanisches Ribb-Ei, mit Onion Rings, zwäähh Dipps und afrikanische Sießäppelschdicks fer nidd geloche unner achzäh Euro. Des nemme mer. Flääschkichelscher hämm mer leider nidd gsehe. Fer alle Fischköpp hier bei Gatsroguide - das sind Frikadellen :-))

Mär beschdellen beim flinke un uffmerksame Kellner zwä Mol des Schdeak, awwer mit normale Erdäppelschdicks anschdadd dem sieße Gelumps.  Hädd mein Kollech des nidd gesehe, dann hädde mer wohl Asiatisch beschdellt ääähhh nadierlich afrikanisch. Hähnel mit Erdnusssoß. Hab des nadierlich verwechselt. Wer denggt dann an än Asiat, wenn ma Hähnel mit Erdnuss liest ?? Awwer in de Speisekard schdeht des als afrikanische Spezialidäd drin. Ich wäß es nidd, awwer `s kinnd sei. Ich hädd mer wadscheins was Australisches bestellt, Hähnel im Kokosmantl mit exotische Beere. ich glaab, des sieht mer immer im Fernsäh, wenn mei Kolleche und ich nachts Australian Open gugge, de Tschokovitsch und de Federer sich die Bäll um die Ohre schlachen, do sieht mer, wie die Leit hinner de Schpieler dort Hähnel im Kokosmantel essen. Odder sind des Beere ?? Ich wäß es nidd, ich kumm vor lauter australischem und afrikanischem Esse ganz durchnanner ...

... zurück zu unsrem Esse un Drinke. Vun Wollmäsche, awwer nidd vun der Höch, sondern vun unne, häm er uns ä Flasch Rohdweih bestellt. Än Cabernäd tüterohn souvignon, mein Name ist Fraaahhnk Riberööhh ... ich glaab vun zwädausend nei war der. Den konnt mer tringe, des Fläsch awwer war uff de Punkt schääähhh gegrillt, gut, bei de Onion Rings kann mer nidd so viel falsch mache, waren gut, hänn gut gepasst. Des Fläsch ordentlich vum Gewicht, die Eräppelschdicks mehr so Potato Dinnger, die waren schähh würzich. Zum Flääsch zwä Dipps, die waren ach ganz gut. De Koch im Pytels hadd awwer sauwwer die Hoor gschnidde. Genau wie die Emmanuell , es ging mit Fraahhnnnk sehr schnööll ....

Fazit:
Im Gsammte war des än ganz gude Besuch, mer wärn beschdimmt, wenn de Belseniggel widder im neie Johr doh war, widder kumme.